Rom 15 | KYG | STEP | Lokiya vaita lagesa afita fatago nehuna vaya'mogitamo lagaitieke'mo lagesa ne'afita lahau'nisiya kava'mo osuta lokiya no'vaiya vaya'mogimo afi'a ha le'a no'afiya kavate'mo vase vase huta hapa maesuna kava'mo hane'niye.

Romans 15

1 Lokiya vaita lagesa afita fatago nehuna vaya'mogitamo lagaitieke'mo lagesa ne'afita lahau'nisiya kava'mo osuta lokiya no'vaiya vaya'mogimo afi'a ha le'a no'afiya kavate'mo vase vase huta hapa maesuna kava'mo hane'niye. 2 Lagaemo lamete lamete huta konagatimogi apamogaga ai'a alagepa hu'a maisayafe'mo hapa maeta alita lokiya vaita apatesuna kavake'mo hane'niye. 3 Kalaisi'a agai'aeke'mo agesa ne'afino agai'a hau'niya kava'mo osu'niya'monanafa agaemo hu'niya kavatefe'mo Goti mukufi gemo'a huno'ae'mo,Hu'a faipa hu'a kate'naya gemo nagaete'mo asagauno ai'niye, huno hu'niye. 4 Akeya'vilagamo avo kae male'naya gemo'mo alino laya malesiyafe'mo avo kae male'nae. Goti mukufi'mo hu'niya gemo'a laha maesigeta o'ataleta atafauta alagi huta mai'nisunageno laipamo'mo falu hu'nisigeta lavayagunagu huta agava maisunafe'mo avo kae male'nae. 5 Goti'a o'ataleta atafauta alagi huta mai'nisunageno'ae'mo laipamo'mo falu hisiya kava'mo aepa vekamo'a lapaipafi'mo ali'ya'mo alisigetapa Kalaisi Yesu'a hu'niya gele'e kavate'efe'mo alagepa hutapa lapakesa afitetapa magokepi lokaeta maiyo. 6 Magoke lapaipa lapakesa ali'netapa magoke lapavayafati'mo Ala kava netimo Yesu Kalaisi Goti'amo Afo'amo agi'ale'mo alita asaga hutapa atesayafe'mae.

7 Inagi Goti'a ala agi'amo alisiyafe'mo Kalaisi'a ago lapavale'niya kava hutapa lapakaemo muki konagatapimogimo apavaleyo. 8 Nagaemo hu'nae'mo, Goti'a Yu vaya'mogita laginago vaya'aife'mo fiku lapa maegauve, huno hapa pai'niya polomasi ge'amo afole aisiyafe'mo Kalaisi'a Goti ali'ya'ale'mo mai'neno'ae'mo Yu vaya'aitegamo uno ali'ya'amo ali'niye. 9 Ani kava huno alu nofi vaya'aife'mo Goti'a hau huno apate'niya'mofe'mo agi'ale'mo ali'a asaga hu'a atesayafe'mo uno ali'ya'amo ali'niye. Goti mukufi gemo'a ani kavatefe'mo huno'ae'mo,

Alu nofi vaya'ai folagapi'mo mai'ne'nae'mo kagikale'mo ali'na asaga hu'na katete'na kagikalefe'mo mono yokemo huguve,
huno hu'niye. 10 Mago'e gemo huno'ae'mo,

Alu nofi vaya'mogitapae, Goti vaya'amogi'e'mo magokepi lapamogaga aiyo,
huno hu'niye. 11 Mago'e gemo huno'ae'mo,

Muki alu nofi vaya'mogitapae, Ala kava ne'mo agi'ale'mo alitapa asaga hiyo. Muki alu nofi vaya'e alu nofi vaya'mogi'e'mo agi'ale'mo ali'a asaga hiyo,
huno hu'niye. 12 Aiyeya'a mago'e gemo huno'ae'mo,

Yesi aginago vaya'mogimo mago yosamo he'ya ai'a atale'naya yosagana hu'a mai'nae. Mai'naya'monanafa magoke aginagomo'a alu nofi vaya'aite'e alu nofi vaya'aite'e'mo yagaino apatesiyafe'mo yosa atufa'afati'mo ausisi aesige'apae'mo alu nofi vaya'mogimo agaefe'mo apavayagunagu hu'a agava maigae,
huno hu'niye. 13 Hemenimo Gotife'mo lapavayagunagu hutapa agava ne'maiya kava'mo aepa vekamo'a mago'e huno lapa maeno lapamisigetapa agaefe'mo lapakesa afita fatago nehutapae'mo mago'e hutapa lapamogaga aisageno lapaipamo'mo falu hugiyanagi. Aote Auneme'amo himamu'aleti'mo mago'e hutapa lapavayagunagu hutapa agava maisayafe'mae.

Polo'a ali'ya'amo ali'niya kavafe'mo ava gemo hu'niya gemae

14 Konaga'nimogitapae, hu'na, alagepa kava'e afi'naya ge'e'mo lapaipa lapakesafi'mo havai te'niyanagetapa afa'a alita apaya malegae, hu'na lole nagesa no'afufa magoke nagesa ne'afuve. 15 Nagesa ne'afuva'monanafa konaga'nimogitapae, Goti'a fiku naha maeno nami'niya'mofe'mo mago kavafe'mo lapakesa afitapa ho hisayafe'mo hu'na ha le'na avo nekaove. 16 Mono hu'a ne'apataya vaya'mogimo Goti'mo ofalinimo ne'amiya kava hu'na alagepa faigoko ge'aleti'mo ali'ya'mo ne'ali'nae'mo alu nofi vaya'mo apavaleli'na e'na ani ofalinimo ali'na Goti'mo amigesuve. Aote Auneme'amo'mo apavaleno alino apaote apatesige'a alagepa ofalinie'mo Goti'a amuse huno atesiya agufa ofalini yakana hu'a maisage'na ali'na amiguve. 17 Mani ali'ya'mo ne'aluva'mofe'mo Goti ali'ya'amo ne'aluva kavatefe'mo Kalaisi Yesu'a naha mae'niya kavateti'mo afa'a hao ke hegauve. 18 Kalaisi'a ayamufa huno nate'nige'na alu nofi vaya'mogi Goti ge'amo afite'a akame hisayafe'mo ge huge lokiya kava'mo huge nehu'na ai'na apavayu huli'na ne'ova kavafeke'mo ava gemo hu'na lapa paiguve. 19 Nagaemo Goti Auneme'amo himamu'aleti'mo no'agaya lokiya aune kava'mo nehu'nae'mo ali'ya'amo ali'nove. Nagaemo Kalaisife'mo alagepa faigoko ge'amo ae'na hakalo hu'na hapa paili'na u'ne'na huli'na Yulusalemu haopalegati'mo e'na muki Ililikamu kotega haopalegamo u'na hapa pai'na hano hu'nove. 20 Nagaemo muki afina'mo Kalaisife'mo alagepa faigoko ge'amo ae'a hakalo hu'a hapa opai'naya vaya'aitega'e'mo u'na ae'na hakalo hu'na hapa paisuvafe'mo nayamukiki hu'nove. Mago vaya'mogi no'mo fai'a ate'nisaya yate'mo no kisuvafe'mo o'nahau'niye. 21 Ani kavatefe'mo Goti'a avo'mo kae male'niya gemo'a huno'ae'mo,

Ava gemo o'afi'naya vaya'mogi agegae. O'afi'naya vaya'mogi afi'a aeto hugae,
huno hu'niye.

Polo'a Lomu taonifi'mo ugesuve, huno hu'niya gemae

22 Alu afina'ae alu afina'ae'mo lapakaetegamo ugefe'mo nehuva'monanafa o'afi'naya vaya'aitega'e vaya'aitega'e'mo u'ne'na hu'na ae'na hakalo hu'na hapa nepauva'mofe'mo visuva ka'nimo alagi ohane'niye. 23 Ohane'niya'monanafa hemenimo manile'mo ae'na hakalo hu'na hapa paisuva ko'mo ohane'nige'na muki kafuga'ae'mo u'na lapakegefe'mo nehuva'mofe'mo Sipeni kotega visuva afina'mo u'na lapakegauve. U'nae'mo hogote'na lapakae'e'mo mago afina'mo mai'ne'na namogaga aiguve. Amuse hutapa natetesage'nae'mo Sipeni kotegamo uguve, hu'na nagesa ne'afi'na navayagunagu nehuve. 25 Hemenimo Yulusalemu taonifi'mo mai'naya apaote vaya'mo hapa mae'na apamisuva ofalini monimo alini'na Yulusalemu taonifi'mo visuvafe'mo nehuve. 26 Masetoniya kotega siosi vayanagi Akaiya kotega siosi vayanagi hu'a Yulusalemu taonifi'mo mai'naya apaote vaya'mo kagemi ya'apimo ohane'niya vaya'mo hapa mae'a apamisayafe'mo hapau'nige'apae'mo mago ofalini monimo nami'nae. 27 Apakai'apimo hapau'niya'monanafa Yu vaya'mogi hapa mae'naya'mofe'mo Yu vaya'mo hapa maesaya anona'apimo hane'niye. Yu vaya'mogimo apaune'apame'mo hapa maesiya ya'mo ago hapa mae'a ali'a apami'naya'mofe'mo apakaemo Yu vaya'mo amega apakufamo hapa maesigeno alagepa huno hanesiya ya'mo ali'a apamisaya anona'apimo hane'niye. 28 Nagaemo mani muki male'naya ofalini monimo'a alagagana huno afole ai'niya ofalini monimo alini'na u'na apamite'nae'mo Sipeni kotega visuvategamo u'na lapakae'e'mo maiguve. 29 Ago afi'novana u'na ava'yi hute'na Kalaisife'mo alagepa faigoko ge'aleti'mo lapa mae'na mago'e ya'mo ali'na lapamiguve. 30 Konaga'nimogitapae, Lapao ke hovanagi, Ala kava netimo Yesu Kalaisife'mo lapau lapayamopafi'mo lapau'nisigetapa Goti Auneme'amo'mo lapaipafi'mo ali'ya'mo ali'nigetapa Goti mafa'ne'ae'mo lapau lapayamopafi'mo nelapaiya'mofe'mo lapayamukiki hutapa naha maeta nunumu'mo hutapa nateyo. 31 Goti'a Yuta kotega apakesa afi'a fatago osu'naya vaya'ai apayapati'mo nagufamo alino katino natesiyafe'mo nunumu'mo hutapa natege Yulusalemu taonifi apaote vaya'mo hapa maesuge'apae'mo amuse hisayafe'mo nunumu'mo hutapa natege hutapa maiyo. 32 Lapakaemo nunumu hisageno'ae'mo Goti'a hau'nisiyana lapakaetegamo u'na ava'yi hute'na lusi kava hu'na namogaga ne'ai'na lapakae'e'mo magokepi lokae'na mai'ne'nae'mo naipamo'mo falu hugiye. 33 Goti'a alagepa huta ne'mauna ya'mo aepa vekamo'a muki'amogitapa'e'mo magokepi lokaeno maino. He. Lama ge.